Uncategorized

Some poetries of mine…just saving them in my notes so they may not get lost….

 

Key aakey baitha hi tha kehney lagi mujhsey zameen,

zara sa let lo aaraam hi mil jaye kahin,

suna hai tooney badey talkh waqt dekhay hain,

suna hai Sabr hai kya tujhko yeh guman hi nahin…

 

 

Aaj phir haath ye baithey hain qalam ko ghairey,

raat sotey huey kehti hai bhula do chehrey,

waisey aadat to nahi hai mujhey ruk jaaney ki,

 kya karoon dard hi bharta hai zakhm ko merey….

 

 

Nam o nishan dede tera koi mujhey ab lakar,

mehfilon main bhi hun tanha kya karoon main aakar,

jinki aaghosh main sadiyan si guzaaree the hamne,

woh bhi kehtey hain aaraam karo ghar jaakar….

 

 

Neend bhi thak Har ke ab maangti duhai hai,

raat par raham kar yeh keh rahi beenayi hai,

Tu hi kar faisla yeh baat ghalat hai ki nahi,

kya bulaya tha Jo Teri yaad chali aayi hai….

 

 

Haal kuch aisa tha kartey to bayan kya kartey

Dundhli kamzor si yadon ko rawaan kya kartey

Khud ko bujhtey hue dekha to humain yaad aaya

 Aaj tum paas jo hotey to chiraghaan kartey

 

Qafila chhoot gaya, himmatain tamam hui

hum bhi ab ruk gaye dekha jo thodi shaam hui

paon ki mohron ko dhoonda to palat kar hans diye

ek faqat ummeed thi woh aandhiyon key naam hui……

 

Shartain kuch khel ki aisein thein gila, kya karna

Humney manga tha jo humko na mila, kya karna

Ab yahi soch kar mainey bhi shikasti chun li

Yahi hai daur main momin ka sila, kya karna…..

 

Rooth kar baith gaya hai tu bhala kyon danish.

Kaun hai aaj yahaan tujh ko mananey wala…..

 

Khwahishain itni thein ke khud hi sharamsaar hue……

Kaun sa rung tha jis ke na talabgaar hue…….

Haya ko baich kar Jo dost Kuch khareeday they…..

Mila Jo mauqa unhain, wo bhi kahin faraar hue…..

 

Besabab Soch kar tuney hai nazar kyon pheri…..

Shahar veeran hai Aur uspe berukhi teri……

Ab to Bas qafiye milataa Hun…

Jaaney koi le gaya shayari meri……

 

Shart rakh kar mujhsey boley ab zara has ke dikha….

Aansoo gar jo gir gaya to soch ley apni saza……

Saude baazi dekh kar samjha hun ab tera usool….

Chit bhi teri, pat bhi teri, sikka terey baap ka…..

 

chand aaonsoo jo bachaye ke mileygii maghfirat…………….

woh bhi sanam ki yaad key sadqey main beh gaye………….

 

karkey woh bhool gaya waadey wafa ke saarey……

Ek hum hain ki bhooley nahi dhoka uska….

 

raat key teejay peher hum jo achanak se uthey……..

waqt ki kitaab se kuch warq ghayab se dikhey……

ek lamha yeh hua ehsaas key sab theek hai……

raat bhar phir jaaney kyon, kis baat par hastey rahey…

 

Shayari hans ke yeh boli zara ek baat bata…….

Raat kaafi hai, qalam chor aur mujhko na sata….

Roz ka khel nahi hai ki nai aamad ho……

Aaj dil gham se bhi khaali hai yeh hai tujhko pata…..

 

Jo Ankhon ki tareef they kartey rehtey….

Ujaaley ka mujh se watan poochtey hain…

 

Kahan tak hai rasta , kahan par hai manzil….

yeh pairon main uth tey waram poochtey hain….

 

kab tak likhogay zulm ki kahani….

siyaahi se uskey qalam poochtey hain….

 

Sabr se Mainey , kabhi Sabr ne mujhsey na kaha…

Kya wajah thi ki terey zulm ko har bar saha…

Bas yahi Soch kar har bar qalam rukta hai….

kya Khabar likhney hi baitha ho mera yaar wahan…..

 

Meri Paband Koshish hai tujhey har din bhulaaoon main….

Bohut takleef deti hai yeh Pabandi meri mujhko……

 

Ke maazi ko talashoon main nahi aadat hai yeh meri… 

Kabhi Achcha sa lagta hai khudi se rubaroo hona……

 

saathi bhi sab bichadd gaye, ab to khayal kar…..

ya khwahishon ne saari hayaa baich khai hai…

 

Be rabta hua bhi to andaaz daikhiye…

Bola ki teri gharz thi ratoon ko jaagna….

 

Kal kuch aisi ajab shakal daikhi…

Maano chalti hui ghazal daikhi….

 

Jahaan pe khatm hua jaakey husn o jamaal

Kal kuch aisii hi ek pehel daikhi….

 

Zulmon o sitam key jaam ko apney na talaf kar…

Pyaley main mere sabr ke koi jagah nahi…..

 

bas yahi soch kar kamiyon ko teri bhoolta hun….

key imtihaan mairii khoobiyon ka hai shaayad….

 

mujhey samjhney ka dawah bhi kar diya usney…

aur phir pyaar se bola ki maajra kya hai…..

 

gul gaya, gulshan gaya aur gayi binaii bhi….

aaj to shikway ke laayaq bhi nahi hain doorian……

 

Dhoka diya nigah ko tawajjo ne aaj fir…..,

 dushman ko janta nahin, badla kya khaaq lun…

 

Mujhko talaash karta hai woh aisey sheher main…..

Rastey bhi thak chukey hain mujhey dhoond kar jahaan….

 

Jagtey hi aaj jaaney kyon Aankhon main hai chubhan….

Lagta hai khwaab phir koi poora na ho saka……

 

mujhko khabar nahin hai lamhon ki aajkal…

woh mangney hisaab sadiyon ka aa gaye…

 

Jashn e bahar poochey to ye dena ittila……

khamoshiyon ke saath hun masroof aajkal….

 

Saari sayahi raat ki yadon main kar ke faut……

Khoon e Jigar se khwaab qalam band kar liya…..

 

Ab maut ko bhi soch kar aata nahi hai khaauf….

teri saza ne mujhko kuch aisey badal diya…

 

Quwwat main meri sabr hai, woh kar raha hun main…..

fitrat main teri zulm tha jo tooney kar diya…..

 

Ek Aansoo tha faqat jo merey saath tha rehta…..

In raet key logon ne wo bhi jazb kar liya…..

 

jab bhi aankhon se sunayi to tum mere they….

aaj boley ho to lagta hai kahani kya hai……

 

Kar na ek sa rehney ki zid tu yun danish…….

jo nahi badla usey waqt ne mita dala….

Jashn kaisey karega hukmarani ka ye ab na soch…..
Sharam jo thodi baaqi thi usi ko aag dikhla de…

Advertisements
Standard

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s